Golaha Wasiirrada Dawlad Goboleedka Waqooyi-Bari Soomaaliya : Hoggaan Isugu Jira Aqoon, Khibrad iyo Jiilal Kala Duwan

Golaha Wasiirrada Waqooyi-Bari: Hoggaan Isugu Jira Aqoon, Khibrad iyo Jiilal Kala Duwan

Dawladda Waqooyi-Bari waxay ku jirtaa marxalad cusub oo u baahan hoggaan tayo, aqoon iyo waayo-aragnimo isku dhafan. Golaha wasiirrada ee hadda loo magacaabay maamulka Waqooyi-Bari ayaa noqday kuwo si gaar ah u soo jiitay indhaha bulshada, maadaama uu ka kooban yahay aqoonyahanno, khubaro sare, waayeel waaya-arag ah iyo dhalinyaro firfircoon oo u diyaarsan in ay door muuqda ka qaataan horumarinta deegaanka.

Aqoonyahanno iyo Khubaro u Diyaarsan Adeeg Bulsho

Wasiiro badan oo golaha ka mid ahi waa shaqsiyaad aqoon durugsan u leh maamullada casriga ah, qorshaynta, maamulka hantida dadweynaha, iyo adeegyada bulshada. Waxay u soo shaqeeyeen hay’ado kala duwan, qaarna waxay ku soo shaqeeyeen jaamacado iyo mashruucyo horumarineed oo waaweyn. Aqoontan ballaadhan waxay u sahlaysaa in ay fahmaan sida loo dhiso nidaam dawladnimo oo shaqeynaya, isla markaana loo xalliyo caqabadaha taagan ee bulshada.

Waayeel iyo Dhalinyaro Isku Darsamay

Waxaa golaha ku jira waayeel waaya-aragsan oo muddo badan ku soo jiray hawlaha bulshada, maamulka iyo dhexdhexaadinta arrimaha deegaanka. Waayo-aragnimadooda ayaa ah tiir muhiim ah oo lagu hagaajin karo go’aan-qaadashada.

Sidoo kale, waxaa jira dhallinyaro tamar iyo hal-abuur leh, kuwaas oo keeni kara fikrado cusub, farsamooyin casri ah iyo hab-maamul waafaqsan dunida maanta. Isku darka waayeelka iyo dhalinyarada wuxuu abuuraa miisaan iyo dheellitir hoggaamineed oo aan laga maarmin.

Khubaro Horay U Soo Noqday Wasiirro

Qaar ka mid ah wasiirrada cusub hore ayay u soo ahaayeen wasiirro ka tirsan maamulkii hore. Taasi waxay ka dhigan tahay in ay si fiican u fahansan yihiin hab-dhiska dawladnimada, caqabadaha jira, sida loo maamulo wasaarad, iyo sida loo xaqiijiyo adeeg hufan oo bulshada gaadha. Khibradahani waa hanti qaali ah oo haddii la maareeyo wax weyn ku kordhin kara maamulka Waqooyi-Bari.

Xildhibaanno Hore oo Sharciga u Dhuuxa

Wasiirro kale oo golaha ku jira waxay hore u soo ahaayeen xildhibaanno, taasoo ka dhigtay in ay faham qoto dheer u leeyihiin sharciga, xeer-dejinta, iyo nidaamka siyaasadeed. Waxay awood u leeyihiin in ay hagaan hanaanka sharci dejinta, isla markaana hubiyaan in howlaha wasaaradahoodu u socdaan si waafaqsan xeerarka iyo nidaamka dawladnimo.

Haddii Ay Sida Loo Igmaday U Shaqeeyaan…

Golahan wasiirrada ee tayo ahaan kala duwan, khibradna isku dhafan, wuxuu leeyahay awoodo badan oo haddii la mideeyo wax ka beddeli kara muuqaalka dawlad goboleedka Waqooyi-Bari. Haddii ay u shaqeeyaan sida loogu igmaday – si daacadnimo, karti iyo kalsooni leh – waxay wax ka qaban karaan:

Amniga iyo xasilloonida deegaanka

Adeegyada bulshada sida caafimaadka, waxbarashada iyo biyaha

Horumarinta dhaqaalaha, shaqo-abuurka iyo maalgashiga

Dib-u-habeynta hay’adaha dawladda

Kordhinta kalsoonida shacabka ee maamulka

Golaha wasiirrada maanta jira waa mid ka muuqata in uu yahay isku darkii ugu habboonaa ee aqoon, waayo-aragnimo iyo jiilal kala duwan. Taasi waxay rajada bulshada u dhigtay meel sare, iyadoo dadka reer Waqooyi-Bari ay filayaan in golahan cusub uu horseedo horumar, maamul-wanaag iyo waxqabad dhab ah.

W/Q Anwar Mohamoud Haji Khaliif